2Ch 8 | NdeIBE | STEP | Ekupheleni kweminyaka engamatshumi amabili, leyo uSolomoni akha ngayo ithempeli likaJehova kanye lesigodlo sakhe,

2 Chronicles 8

Ezinye Izenzo ZikaSolomoni

1 Ekupheleni kweminyaka engamatshumi amabili, leyo uSolomoni akha ngayo ithempeli likaJehova kanye lesigodlo sakhe,

2 uSolomoni wabuye wavusa imizi uHiramu ayemnike yona, wahlalisa abako-Israyeli kuyo.

3 USolomoni wayahlasela iHamathi Zobha wayithumba. 4 Wakha njalo leThadimore enkangala layo yonke imizi yeziphala ayakha eHamathi. 5 Wavusa iBhethi Horoni elingaphezu kanye leBhethi Horoni elingaphansi, imizi ebiyelweyo elemithangala lamasongo alemigoqo, 6 kanye leBhalathi lemizi yonke yokugcinela amabele, leyokugcinela izinqola zakhe zokulwa lamabhiza akhe – lakho konke okunye ayengafisa ukukwakha eJerusalema, leLebhanoni kanye lukulo lonke ilizwe ayelibusa.

7 Abantu bonke ababesele kumaHithi, lama-Amori, lamaPherizi, lamaHivi kanye lamaJebusi (lababantu babengasiwo ama-Israyeli),

8 kutshiwo labainzalo yabo eyayisele elizweni, labo abangabhujiswanga ngama-Israyeli – uSolomoni wababutha baba yizigqili: njengoba kunjalo kuze kube lalamhla. 9 Kodwa abako-Israyeli uSolomoni kabenzanga izigqili emsebenzini wakhe; babengamadoda akhe empi, abalawuli bezinduna zebutho, labalawuli bezinqola zokulwa labokulwa ngezinqola zokulwa. 10 Njalo babeyizikhulu zenkosi uSolomoni – bengamakhulu amabili alamatshumi amahlanu ababephethe abantu.

11 USolomoni wasusa indodakazi kaFaro eMzini kaDavida wayisa esigodlweni asakhela yona, ngoba wathi, “Umkami kamelanga ahlale esigodlweni sikaDavida inkosi yako-Israyeli, ngoba izindawo esezike zangena ibhokisi lesivumelwano sikaJehova zingcwele.”

12 USolomoni wasenikela kuJehova umhlatshelo wokutshiswa phezu kwe-alithare likaJehova ayelakhele phambi komphempe,

13 kulandelwa umkhuba wemihla ngemihla njengokulaya kukaMosi eqakathekisa iSabatha, lokuThwasa kweNyanga kanye lokwemikhosi emithathu yomnyaka – uMkhosi weSinkwa esingelamvubelo, uMkhosi wamaViki loMkhosi wamaThabanikeli. 14 Elandela isimiso sikayise uDavida wamisa izigaba zabaphristi ngezinkonzo zabo, njalo abaLevi bekhokhela ekudumiseni lokuphathisa abaphristi kusiya ngemfanelo yemihla ngemihla. Wakhetha abalindi bamasango ngezigaba ukulinda amasango ehlukeneyo ngoba yikho okwakutshiwo nguDavida umuntu kaNkulunkulu. 15 Kabaphambukanga kulokho inkosi uDavida eyayikutshilo mayelana labaphristi labaLevi kanye lezindlu zenotho.

16 Wonke umsebenzi kaSolomoni wenziwa, kusukela ngosuku lokubekwa kwesisekelo sethempeli likaJehova kwaze kwaba sekupheleni kwawo. Kwaba yikuphela kokwakhiwa kwethempeli likaJehova.

17 Ngakho uSolomoni wasesiya e-Eziyoni-Gebheri lase-Elathi ngasemakhunjini ase-Edomi

18 UHiramu wathumela kuye imikhumbi eyayiphethwe yizinduna zakhe, amadoda ayelwazi ulwandle. Zona, kanye lezinceku zikaSolomoni zaya e-Ofiri, zayathwala igolide elingamathalenta angamakhulu amane lamatshumi amahlanu, zayalethula enkosini uSolomoni.